Laufásprestakall

Líf og fjör á fjölskylduhátíð í Laufási

Bolli Pétur Bollason — Mon, 14 May 2012 16:31:38 +0000

Hún var ánægjuleg fjölskylduhátíðin, sem átti sér stað í Laufási á mæðradaginn 13. maí síðastliðinn. Þar vorum við að þakka fyrir uppskeru vetrarins í kirkjustarfinu. Um 80 börn og fullorðnir komu saman á helgum reit. Hátíðin hófst í Laufáskirkju. Þeir sr. Bolli og Hjalti Jónsson söng-og spéfugl leiddu stundina. Barnakór Svalbarðsstrandar söng sumar í viðstadda, en það var sannarlega kærkomið þar sem maíhret var byrjað að hrella fólk.Barnakór Svalbarðstrandar söng 5 lög undir stjórn Sigríðar Huldu Arnardóttur og Sigrúnar Mögnu Þórsteinsdóttur, sem lék á orgelið. Kórinn var landi og þjóð til sóma og viðstaddir hlustuðu ákaflega vel. Sr. Bolli sagði biblíusöguna um Talenturnar, sem felur þann boðskap m.a. í sér að við eigum að virkja hæfileika okkar. Þá kom brúðan Sólveig upp úr prédikunarstólnum og efaðist um hlutverk býflugna, en Hjalti kom henni í skilning um það að þær hafa hlutverk eins og aðrir. Þá var mikið sungið, kirkjan ómaði öll og ýmsir gleymdu sér t.d. í laginu um þau Daníel og Rut. Eftir stundina var öllum boðið inn í þjónustuhús og þar þáði unga fólkið pylsur og djús og frostpinna á meðan hinir fullorðnu gæddu sér á girnilegu bakkelsi frá Ártúni og stóðu Ártúnshjón Kristín og Benedikt vaktina í kaffisölunni ásamt fjölskyldu sinni. Það er hrein dásemd að fá gott og lipurt veitingafólk í þjónustuhúsið og spennandi að kíkja við í Laufási í sumar og fá sér kræsilegt kaffi. Barnakórinn var í miklu söngstuði og flutti 2 aukalög í þjónustuhúsinu. Þá var gamli torfbærinn opinn og börnin hoppuðu og skoppuðu í bæjargöngunum, hvort einhverjir hafi fundið búsældarlegar hunangsflugur á gólfum skal ósagt látið. En hátíðin tókst afar vel og gaman að sjá marga koma þrátt fyrir heldur dimma veðráttu. Guð blessi okkur svo sumarið!!

Fjölskylduhátíð í Laufási

Bolli Pétur Bollason — Tue, 08 May 2012 17:48:48 +0000

Nú er komið að því!! Fjölskylduhátíð í Laufási á mæðradaginn 13. maí kl. 14.00. Hátíðin hefst í Laufáskirkju þar sem barnakór Svalbarðsstrandar syngur undir stjórn Sigrúnar Mögnu Þórsteinsdóttur og Sigríðar Huldu Arnardóttur. Sr. Bolli leiðir stundina ásamt Hjalta Jónssyni söngfugli og gleðigjafa, sem spilar á gítar. Við syngjum saman um vorið og sumarið og heyrum sögu úr Biblíunni. Þá koma góðir gestir. Eftir kátínu í kirkju verðar grillaðar pylsur sunnan við þjónustuhús og hoppukastali verður hoppandi vestan við þjónustuhús. Gamli torfbærinn verður opinn og aðgangur í boði prestakallsins og kaffisala verður í þjónustuhúsi, þar sem mamma og pabbi geta keypt sér cafe latte og hugsað um leið um tilgang tilvistar eins og hinir svokölluðu lattelepjandi lopatreflar. Þetta verður góður mæðradagur, spáin ágæt enn og fuglasöngurinn ómar um allt í Laufási. Verið öll hjartanlega velkomin!!

Helgistund og aðalsafnaðarfundur í Svalbarðskirkju

Bolli Pétur Bollason — Tue, 01 May 2012 07:40:56 +0000

Aðalsafnaðarfundur Svalbarðssóknar verður haldinn fimmtudagskvöldið 3. maí kl. 20.00 og hefst með helgistund. Á dagskrá verða venjuleg aðalfundastörf og önnur mál. Gott og hollt verður að koma saman og ræða málefni safnaðarins. Þarna fáum við líka tækifæri til þess að koma á framfæri ábendingum og tillögum í tengslum við safnaðarstarfið o.fl. Verið öll hjartanlega velkomin!

Helgistund og aðalsafnaðarfundur á Grenivík

Bolli Pétur Bollason — Sat, 28 Apr 2012 14:33:05 +0000

Aðalsafnaðarfundur Laufáss-og Grenivíkursóknar verður haldinn í safnaðarstofunni á Grenivík mánudaginn 30. apríl kl. 20.00 og hefst með helgistund í Grenivíkurkirkju. Á dagskrá verða venjuleg aðalfundarstörf og önnur mál. Öll erum við hvött til þess að mæta á þann fund og ræða málefni sóknarinnar. Sjáumst á aðalsafnaðarfundi á Grenivík!!

Helgistund og aðalsafnaðarfundur við Ljósavatn

Bolli Pétur Bollason — Wed, 25 Apr 2012 09:37:41 +0000

Aðalsafnaðarfundur Ljósavatnssóknar verður haldinn í Þorgeirskirkju miðvikudagskvöldið 25. apríl kl. 20.30 og hefst hann með helgistund. Venjuleg aðalfundarstörf og önnur mál verða á dagskrá og er safnaðarfólk hvatt til þess að mæta og ræða málefni sóknar, en bæn, samtal og samstarf skiptir höfuðmáli svo hver söfnuður megi blómstra og dafna Guði til dýrðar. Sjáumst í Þorgeirskirkju miðvikudagskvöldið 25. apríl.

Fermingarmessa í Svalbarðskirkju

Bolli Pétur Bollason — Mon, 16 Apr 2012 15:56:01 +0000

Fermingarmessa verður í Svalbarðskirkju á sumardaginn fyrsta 19. apríl næstkomandi kl. 10.30. Kirkjukórinn syngur undir stjórn Hjartar Steinbergssonar. Gengið verður að borði Drottins. Þessi börn verða fermd: Almar Bjarki Atlason, Gabríel Goði Caceres, Kristófer Arnar Guðmundsson, Sesselja Guðrún Rögnudóttir og Sóley María Hauksdóttir. Verið öll hjartanlega velkomin til kirkjunnar að gleðjast með unga fólkinu!!

Helgistund og aðalsafnaðarfundur Hálssóknar

Bolli Pétur Bollason — Thu, 12 Apr 2012 09:04:30 +0000

Aðalsafnaðarfundur Hálssóknar verður haldinn á Illugastöðum 15. apríl næstkomandi eftir helgistund í Illugastaðakirkju sem hefst kl. 20.30. Venjuleg aðalfundastörf. Alltaf gott að koma og kynna sér málefni kirkjunnar og safnaðarstarf í sókn og prestakalli. Verið velkomin! Sóknarnefnd.

Páskahelgihald í Laufásprestakalli

Bolli Pétur Bollason — Mon, 02 Apr 2012 15:58:05 +0000

Páskaguðsþjónustur 8. apríl:
Kl. 8.00 í Grenivíkurkirkju. Morgunverður í boði kirkjukórs að guðsþjónustu lokinni.
Kl. 11.00 í Svalbarðskirkju.
Kl. 14.00 í Þorgeirskirkju.
Kl. 16.00 í Lundarbrekkukirkju.
Kl. 20.30 annan í páskum í Hálskirkju.
Kirkjukórar syngja undir stjórn organista Hjartar Steinbergssonar og Dagnýjar Pétursdóttur.
Gleðilega páskahátíð! Jesús er upprisinn, Jesús er sannarlega upprisinn!!

Föstuganga í Laufás

Bolli Pétur Bollason — Mon, 02 Apr 2012 15:48:49 +0000

Föstuganga verður í Laufás á föstudaginn langa. Lagt verður af stað frá Svalbarðskirkju kl. 11.00, frá Végeirsstöðum í Fnjóskadal kl. 11.00 og frá Grenivíkurkirkju kl. 12.30. Súpa í þjónustuhúsi í Laufási við komu á 1500kr. Tónleikar í Laufáskirkju kl. 14.00 í boði Eyjafjarðar-og Þingeyjarprófastsdæmis. Kristjana Arngrímsdóttir og Kristján Eldjárn Hjartarson flytja tónlist. Verið öll hjartanlega velkomin hvort sem gengið verður eður ei.

Fermingarmessa í Laufáskirkju á skírdag

Bolli Pétur Bollason — Mon, 02 Apr 2012 15:42:08 +0000

Fermingarmessa verður í Laufáskirkju á skírdag kl. 14.00. Fermd verða: Björn Andri Ingólfsson, Rakel Lind Sveinsdóttir og Svanur Berg Jóhannsson. Kirkjukórinn syngur undir stjórn Hjartar Steinbergssonar. Verið velkomin!